Browntop_Millet_Pongal

குலசாமை பொங்கல் : 

#குலசாமை ஆங்கிலத்தில் பிரவுன் டாப் மில்லெட் [ Browntop Millet or sometimes American Millet ] என அழைக்கப்படுகிறது.

அறிவியல் பெயர் : Brachiaria ramosa or Urochloa ramosa

கன்னட பெயர் : Pedda sama or korle

மிகப்பழங்காலத்திலிருந்தே குலசாமை மக்களின் உணவாக இருந்த போதிலும் இடையில் இத்தானியம் உபயோகத்திலிருந்து மறைந்தே போய்விட்டது. தற்போது இத்தானியம் கர்நாடகத்தில் அதிகமாக விளைவிக்கப்படுகிறது. இதைத்தவிர தமிழ்நாடு, ஆந்திரா மற்றும் மஹாராஷ்ட்ரா மாநிலங்களில் சிற்சில இடங்களில் பயிரிடப்படுகின்றன. குலசாமை மிகவும் குறைந்த அளவிலே விளைவிக்கப்படுவதால் மற்ற சிறுதானியங்களை விட விலை கூடுதலாகவே இருக்கிறது.

குலசாமை பழுப்பு பச்சையுடன் கூடிய மஞ்சள் நிறம் கொண்டது. 

இதன் நார்சத்து மற்ற அனைத்து சிறுதானியங்கள் மற்றும் மற்ற தானியங்களை விட மிக அதிக அளவில் கொண்டுள்ளது. அதிக நார்சத்து உடலின் நச்சுக்களை வெளியேற்ற மிகவும் உதவுகிறது.

அகில இந்திய சிறுதானிய ஆராய்ச்சி கழகத்தின் வலைதளத்தின் படி 100 கி குலசாமையில் அடங்கியுள்ள சத்துக்கள் :

நார்சத்து 12.5 கி, புரதச்சத்து  11.5 கி, தாதுப்பொருட்கள் [ minerals ] 4.21 கி, நியாசின் [ B 3 ] 18.5 mg, இரும்புசத்து 0.65 mg.

எல்லாவகையான சிறுதானியங்களையும் குறைந்தபட்சம் இரண்டு மணிநேரமாவது ஊறவைத்தபின்னர் சமைப்பது நல்லது. அவ்வாறு ஊறவைப்பதால் அத்தானியத்தின் முழுப்பலன்களும் உடலுக்குக்  கிடைக்கிறது.

குலசாமையை ஊறவைக்க வேண்டுமாதலால் 2 மணிநேரம் முன்பே திட்டமிட  வேண்டும்.

தேவையான பொருட்களை சேகரிக்க 10 நிமிடங்கள் 

தயாரிக்க ஆகும் நேரம்               15 நிமிடங்கள்

தயாரிக்கப்படும் அளவு               2 முதல் 2 1/2 கப்.

தேவையானவை :
3/4 கப்	குலசாமை [Browntop millet]
1/4 கப்	பச்சைப்பருப்பு
1/4 Tsp	வெந்தயம் [ optional ]
1 Tsp	மிளகு
1 1/2 Tsp	சீரகம்
1 Tsp	இஞ்சி பொடியாக நறுக்கியது
1 Tsp	மஞ்சள் கிழங்கு பொடியாக நறுக்கியது*
10 - 15	கருவேப்பிலை
4 - 5 பற்கள்	பூண்டு, பொடியாக நறுக்கவும்
1	பச்சை மிளகாய் [ optional ]
3/4 Tsp	உப்பு [ adjust ]
தாளிக்க :
5 - 6	முந்திரி பருப்பு, துண்டுகளாக்கவும்
1 Tsp	சீரகம்
8 - 10	மிளகு
10 - 12	கருவேப்பிலை
3 -4 Tsp	நெய்

* மஞ்சள் கிழங்கு இல்லையென்றால் 1/4 Tsp மஞ்சத்தூள் உபயோகிக்கவும்..

செய்முறை :

குலசாமை யை ஒரு பாத்திரத்தில் எடுத்து ஒரு முறை கழுவிய பின்னர் 3 கப் தண்ணீரில் 2 மணி நேரம் ஊறவைக்கவும்.

மிளகை ஒன்றிரண்டாக உடைத்து வைத்துக்கொள்ளவும்.

இரண்டு மணிநேரம் கழிந்த பின்னர் ஊறவைத்த குலசாமையை தண்ணீருடன் சேர்த்து 3 லிட்டர் குக்கருக்கு மாற்றவும்.

அதில் கழுவிய பச்சைப்பருப்பு, வெந்தயம், சீரகம், மிளகு உடைத்தது, பொடியாக நறுக்கிய இஞ்சி, மஞ்சள், பூண்டு மற்றும் உப்பு சேர்க்கவும்.

ஒரு கரண்டியால் நன்கு கலந்து விடவும்.

குக்கரை மூடி விசில் பொருத்தி அதிக தீயில் சூடாக்கவும்.

ஒரு விசில் வந்த பிறகு தீயைக் குறைத்து மேலும் 8 நிமிடங்கள் வேகவிடவும்.

ஆவி அடங்கும் வரை பொறுத்திருக்கவும்.

அதனிடையே அடுப்பில் மிதமான தீயில் ஒரு வாணலியை சூடாக்கவும்.

முதலில் சிறிது நெய் விட்டு முந்திரி துண்டுகளை பொன்னிறமாக வறுத்து எடுக்கவும்.

அடுத்து அதே வாணலியில் நெய் விட்டு சீரகத்தை வெடிக்க விட்டு பின்னர் மிளகு சேர்த்து பொரியும் வரை வறுக்கவும்.

மிளகு நன்கு வறுபட்டவுடன் அடுப்பை அணைத்துவிட்டு கருவேப்பிலையை கிள்ளிப்போடவும்.

இதற்குள் குக்கரில் ஆவி அடங்கியிருக்கும்.

குக்கரின் மூடியை திறந்து பொங்கலின் மீது தாளித்த மிளகு, சீரகம் கருவேப்பிலை மற்றும் முந்திரியைப்போடவும்.

கரண்டியால் கிளறி விடவும்.

அருமையான குலசாமை பொங்கல் தயார்.

சூடாக தட்டில் பரிமாறி தாராளமாக நெய் ஊற்றி, 

தேங்காய் சட்னி  அல்லது  பொங்கல் துவையல் 

அல்லது வடவத்துவையல் ஆகியவற்றில் ஏதாவது ஒன்றுடன் சுவைக்கவும்.

வெங்காய சாம்பார் தொட்டுக்கொண்டு சாப்பிட்டாலும் அருமையாக இருக்கும். 

மேலும் சில சிற்றுண்டிகள் செய்து பார்த்து ருசிக்க :

மசால் தோசை	குலசாமை ரொட்டி	ஆப்பம்
குலசாமை முடக்கத்தான் தோசை	குதிரைவாலி நீர் தோசை	தினை சக்கரை பொங்கல்

மற்றும் பல சிற்றுண்டி வகைகளுக்கு 

டிபன் வகைகள்

சிறுதானிய சமையல் முறைகள்

தொட்டுக்கொண்டு சுவைக்க

Other_Tiffins

 இங்கே மேலும் சில பலகாரங்களின்  செய்முறை இணைப்புகளை பகிர்ந்துள்ளேன்.

சோளம் குழி பணியாரம்	தினை குழி பணியாரம்
பசலைக்கீரை குழி பணியாரம்	பசலைக்கீரை சோளம் வதக்கல்
நூடுல்ஸ் தக்காளி சட்னியுடன்	கேழ்வரகு இனிப்பு குழி பணியாரம்

விதவிதமான சமையல் செய்முறைகள் 

சிறுதானியங்கள் சமையல் செய்முறைகள் 

Beetroot-Vazhaithandu-Aval-Upma

#பீட்ரூட்வாழைத்தண்டுஅவல்உப்புமா : நெல்லை ஊறவைத்து சூடான வாணலியில் வறுத்தெடுத்து உடனே கல்லில் போட்டு உலக்கையால் தட்டி எடுத்து உமி நீக்கினால் #அவல் தயார். இப்போது அவல் தயாரிக்க மின்சாரத்தில் இயங்கும் உலக்கை இயந்திரம் வந்து விட்டது. அதனால் அவல் மெல்லியதாகவும் கெட்டியாகவும் கிடைக்கிறது. மெல்லியதாக இருக்கும் அவல் பால் ஊற்றி அல்லது வெள்ளம் தேங்காயுடன் கலந்து சாப்பிட அருமையாய் இருக்கும். கெட்டி அவல் உப்புமா செய்ய நன்றாக இருக்கும்.
முன்பே பல காய்கறிகளை சேர்த்து அவல் உப்புமா செய்முறையை பார்த்திருக்கிறோம். இப்போது பீட்ரூட் மற்றும் வாழைத்தண்டு சேர்த்து #உப்புமா செய்யும் விதத்தை காண்போம்.

தேவையானவை :
1 கப்	கெட்டி அவல்
1	வெங்காயம், பொடியாக நறுக்கவும்
1/4 கப்	பீட்ரூட்  துருவியது
1 Tbsp	பச்சை பட்டாணி வேக வைத்தது
1/4 கப்	வாழைத்தண்டு மெல்லியதாக அரிந்தது
1 or 2	பச்சை மிளகாய்
2 pinch	மஞ்சத்தூள்
1/4 Tsp	சீரகத்தூள்
1/4 Tsp	மிளகாய்த்தூள் [ அட்ஜஸ்ட் ]
1/2 Tsp	உப்பு [ அட்ஜஸ்ட் ]
1/2 Tsp	எலுமிச்சை சாறு [ அட்ஜஸ்ட் ]
தாளிக்க :
1/2 Tsp	கடுகு
1 Tsp	உளுத்தம் பருப்பு
2 Tbsp	நிலக்கடலை
1/4 Tsp	பெருங்காயத்தூள்
2 Tsp	நல்லெண்ணெய்
அலங்கரிக்க :
1 Tbsp	கேரட் துருவியது
1 Tbsp	கொத்தமல்லி தழை

செய்முறை :

ஒரு அகன்ற பாத்திரத்தில் கெட்டி அவலை எடுத்துக்கொள்ளவும்.
தண்ணீர் விட்டு ஓரிரு முறை கழுவவும்.
அதில் 1/2 Tsp உப்பு தூவி 1/4 கப் தண்ணீர் விட்டு கலந்து வைக்கவும்.
அடுத்து அடுப்பில் வாணலியை வைத்து எண்ணெய் விட்டு சூடேற்றவும்.
எண்ணெய் சூடானதும் கடுகு போட்டு வெடிக்க விடவும்.
கடுகு வெடித்ததும் உளுத்தம் பருப்பு மற்றும் நிலக்கடலை சேர்த்து வறுக்கவும்.
வறுபட்டதும் பெருங்காயத்தூள் சேர்த்து கருவேப்பிலை கிள்ளி போட்டு கீறி வைத்துள்ள பச்சை மிளகாயை சேர்த்து 1/2 நிமிடம் வதக்கவும்.
இப்போது நறுக்கிய வெங்காயத்தை சேர்த்து வதக்கவும்.
வெங்காயம் வதங்கி வெளிர் நிறமாக மாறியதும் பீட்ரூட், வாழைத்தண்டு மற்றும் பட்டாணியை சேர்த்து வதக்கவும்.
தேவையான உப்பு மற்றும் 2 சிட்டிகை மஞ்சத்தூள், மிளகாய்த்தூள் சேர்த்து கலந்து விடவும்.
தட்டு போட்டு மூடி 2 நிமிடங்கள் வேக விடவும்.
இரண்டு நிமிடங்களுக்கு பிறகு உப்பு போட்டு பிசறி வைத்துள்ள அவலை சேர்த்து மிதமான தீயில் நன்கு கிளறி விடவும்.
உப்பு சரி பார்த்து தேவையெனில் உப்பு சேர்க்கவும்.
1/2 Tsp எலுமிச்சை சாறு [ விருப்பப்பட்டால் ] சேர்த்து நன்கு கலந்து விடவும்.
வாணலியை மூடி போட்டு மூடி வைக்கவும்.
அடுப்பை அணைத்து விட்டு அந்த சூட்டிலேயே மூன்று நிமிடங்கள் மூடி வைக்கவும்.
பின்னர் திறந்தாள் சூடான சுவையான பீட்ரூட் வாழைத்தண்டு அவல் உப்புமா தயார்.
இதற்கு தொட்டுக்கொள்ள சட்னி தேவையில்லை. அப்படியே சாப்பிடலாம்.
விரும்பினால் தேங்காய் சட்னியுடன் சுவைக்கலாம்.
தக்காளி சாஸ் தொட்டுக்கொண்டும் சுவைக்கலாம்.
குறிப்பு : அவலின் தன்மைக்கு [ கெட்டித் தன்மை ] ஏற்ப உப்பு சேர்த்து பிசறி வைக்க தண்ணீரின் அளவை கூட்டி குறைத்துக்கொள்ளவும்.






மேலும் சில சுவை மிகுந்த உணவுக் குறிப்புகள்


பல வகையான சமையல் செய்முறைகள்

விதவிதமான பலகார வகைகள்

தொட்டுக்கொண்டு சுவைக்க

Idiyappam - Lemon-Idiyappam

#எலுமிச்சைஇடியாப்பம் : பொதுவாக #இடியாப்பம் தேங்காய் பால் ஊற்றியே சாப்பிடுவது வழக்கம். ஆனால் இடியாப்பம் செய்த பிறகு எண்ணெய் விட்டு கலந்து ஆற வைத்து, எலுமிச்சை அல்லது புளிகாச்சல் ஆகியவற்றுடன் கலந்தும் சுவைக்கலாம்.

தேவையானவை  :
2 ( அ ) 3 ஈடு	இடியாப்பம்
4 Tsp	நல்லெண்ணெய்
1 பெரிய அளவு	எலுமிச்சை பழம் [ அட்ஜஸ்ட் ]
தாளிக்க :
1/2 Tsp	கடுகு
1/8 Tsp	வெந்தயம் [ விரும்பினால் ]
1 Tsp	உளுத்தம் பருப்பு
2 Tsp	கடலை பருப்பு
4 Tsp	நிலக்கடலை
2 ( அ ) 3	பச்சை மிளகாய், பொடியாக நறுக்கவும் [ அட்ஜஸ்ட் ]
10 - 15	கறுவேப்பிலை
3 Tsp	கொத்தமல்லி தழை நறுக்கியது [ விரும்பினால் ]
2 Tsp	காரட் பொடியாக நறுக்கியது [ விரும்பினால் ]
பொடிகள்  :
1/4 Tsp	மஞ்சத்தூள்
1/2 Tsp	சீரகத்தூள்
1/4 Tsp	மிளகாய் தூள் [ அட்ஜஸ்ட் ]
1/4 Tsp	பெருங்காய பொடி
2 Tsp	உப்பு [ அட்ஜஸ்ட் ]

செய்முறை :
முதலில் இரண்டு மூன்று ஈடு இடியாப்பம் ஆவியில் வேகவைத்து எடுத்து ஒரு அகன்ற பாத்திரத்தில் எடுத்து வைக்கவும்.
இரண்டு தேக்கரண்டி நல்லெண்ணெய் விட்டு கலந்து தனியே வைக்கவும்.

எலுமிச்சை பழத்தை இரண்டாக நறுக்கி கொட்டைகளை நீக்கி ஒரு கிண்ணத்தில் தண்ணீரில் மூழ்கி இருக்குமாறு வைக்கவும்.
இவ்வாறு செய்வதனால் தோலின் கசப்புத் தன்மை குறையும்.

அடுப்பில் வாணலியை வைத்து எண்ணெய் விட்டு மிதமான தீயில் சூடாக்கவும்.
கடுகு போட்டு வெடித்த பிறகு வெந்தயம், உளுத்தம் பருப்பு, கடலை பருப்பு மற்றும் நிலக்கடலை சேர்த்து வறுக்கவும்.
பருப்பு அனைத்தும் நன்கு சிவந்த பிறகு பெருங்காய பொடி, கறுவேப்பிலை, பொடியாக நறுக்கிய காரட்  மற்றும் நறுக்கிய பச்சை மிளகாய் சேர்த்து வதக்கவும்.
கொத்தமல்லி தழை சேர்த்து அரை நிமிடம் வதக்கவும்.

அடுத்து கொடுக்கப்பட்டுள்ள அனைத்து பொடிகளையும் மற்றும் உப்பையும் சேர்த்து பத்து வினாடிகள் மட்டுமே வதக்க வேண்டும்.
பொடியை சேர்த்து பிரட்டும் போது கருகி விடாமல் கவனமாக பார்த்துக்கொள்ள வேண்டும்.
அடுப்பை அணைத்து விடவும்.
எலுமிச்சை சாரை பிழிந்து நன்கு கலக்கவும்.
இவ்வாறு தயாரித்த எலுமிச்சை கலவையை இடியாப்பத்தின் மேல் கொட்டவும்.
கைகளால் அழுத்தாமல் நன்கு பிசறி விடவும். கைகளில் பிசுபிசுவென ஒட்டினால் மேலும் சிறிது எண்ணெய் சேர்த்து பிசையவும்.
உப்பு, காரம் மற்றும் எலுமிச்சை சாறு தேவை பட்டால் சேர்த்து கலந்து வைக்கவும்.
சுவையான எலுமிச்சை இடியாப்பம் தயார்.

மதிய உணவிற்கு எடுத்து செல்வதாக இருந்தால் நன்கு ஆற வைத்து பின்னர் டப்பாவில் எடுத்து வைக்கவும்.
மதிய உணவிற்காக செய்யும் போது சிறிது உப்பு, எலுமிச்சை சாறு மற்றும் காரம் சிறிது தூக்கலாக இருக்குமாறு தயாரிக்க வேண்டும்.
அப்போதுதான் சாப்பிடும் போது சுவை சரியாக இருக்கும்.

மற்ற டிபன் வகைகள் முயற்சி செய்ய

சோள இட்லி	தோசை	கோதுமைரவா இட்லி
காஞ்சீபுரம் இட்லி	கம்பு இட்லி

தொட்டுக்கொண்டு சாப்பிட

தொட்டுக்க



இந்த சமையல் குறிப்பு மிகவும் உபயோகமாக இருப்பின் கீழே உள்ள கருத்துக்களை பதிவிடும் பெட்டியில் தங்களது கருத்தினை பதிவிடவும்.

மேலும் தங்களைப்போல மற்றவர்களும் பயனடைய கீழ உள்ள பொத்தான்கள் மூலமாக முகநூல்,  ட்விட்டர், பிண்டரஸ்ட், G+ போன்ற சமூக வலை தளங்களிலும் பகிரவும். நன்றி.

Kanji-Dosai

#கஞ்சிதோசை : அரிசியையும் தேங்காய் துருவலையும் உபயோகித்து
ஆப்பம்கேரளாஸ்டைல் 2 போல ஒரு சிறு மாறுதலுடன் வித்தியாசமாக செய்யப்படும் ஒரு சுவையான தோசை இந்த கஞ்சி தோசை. இதன் தயாரிப்பு முறை  நீர்தோசை போன்று தோன்றினாலும் சிறிது வேறு படுகிறது.
இனி எப்படி செய்வது என காணலாம்.

தேவையான பொருட்கள் :
2 கப்	பச்சரிசி
1/2 கப்	தேங்காய் துருவல்
2 Tsp	உப்பு
1 Tsp	சர்க்கரை [ விருப்பப்பட்டால் ]

தோசை சுட்டெடுக்க தேவையான அளவு நல்லெண்ணெய்

செய்முறை :

ஒரு பாத்திரத்தில் பச்சரிசியை போட்டு நன்கு கழுவி தண்ணீர் விட்டு 2 மணி நேரம் ஊறவைக்கவும்.

ஊறிய பின்னர் மாவரைக்கும் இயந்திரத்தில் ஊறவைத்த அரிசி மற்றும் தேங்காய் துருவல்  ஆகியவற்றை தண்ணீர் விட்டு நன்கு மைய அரைத்து  எடுத்து ஒரு பாத்திரத்தில் வைக்கவும்.

3/4 கப் முதல் 1 கப் வரை தண்ணீர் விட்டு மாவரைக்கும் இயந்திரத்தில் ஒட்டிக்கொண்டுள்ள மாவை கழுவி மற்றொரு அகலமான பாத்திரத்தில் எடுத்து வைக்கவும்.
அடுப்பை பற்ற வைத்து இந்த மாவு கழுவிய தண்ணீர் உள்ள பாத்திரத்தை சிறிய தீயில் சூடாக்கவும்.
தொடர்ந்து கை விடாமல் கலக்கிக் கொண்டே இருக்கவும்.
மாவு கலந்த தண்ணீர் சற்று நேரத்தில் கஞ்சி பதத்தை அடைந்து பளபளப்பாக மாறும்.
இப்போது அடுப்பை அணைத்து விட்டு ஆற விடவும்.
தயாரித்த கஞ்சியின் மேல் ஆடை படியாமல் இருக்க அவ்வப்போது கரண்டியால் கலக்கி விடவும்.

ஆறிய கஞ்சியை அரைத்து வைத்துள்ள மாவுடன் சேர்க்கவும்.

உப்பு மற்றும் சர்க்கரையையும் சேர்த்து கலந்து 6 முதல் 8 மணி நேரம் புளிக்க வைக்கவும்.

அல்லது முதல் நாள் மாலை மாவு அரைத்து இரவு முழுவதும் புளிக்க விட்டு மறுநாள் காலை கஞ்சி தோசை தயாரிக்கலாம்.

அடுப்பின் மேல் தோசை கல்லை வைத்து மிதமான தீயில் சூடாக்கவும்.
சூடானதும் ஒரு சுத்தமான காய்ந்த மெல்லிய சிறு துண்டு துணியை எண்ணெயில் இலேசாக நனைத்து தோசை கல்லை தடவி விடவும்.
இப்போது மாவை கல்லின் ஓரத்தில் இருந்து ஒரு வட்டமாக ஊற்றி நடு வரை நிரப்பவும்.
மேலே சில துளிகள் நல்லெண்ணெய் விடவும்.

வெந்து ஓரங்கள் இலேசாக சிவக்க ஆரம்பித்து இருக்கும்.
திருப்பிப் போட தேவையில்லை.

தோசை திருப்பியினால் தோசையின் மேலே விட்ட எண்ணெயை மெதுவாக தடவி பரப்பி விடவும். இல்லையென்றால்  தோசை வர வரவென்று ஆகி விடும்.
பிறகு கல்லிலிருந்து எடுத்து தட்டில் வைக்கவும்.

இதே போல எண்ணெய் தடவி ஒவ்வொன்றாக சுட்டெடுக்கவும்.


பூண்டு மிளகாய் சட்னியுடன் சாப்பிட்டால் அருமையாக இருக்கும்.
தக்காளி சட்னி மற்றும் பூண்டு தக்காளி  சட்னியுடனும் நன்றாக இருக்கும்.

குறிப்பு :
மாவை புளிக்க வைக்காமல் உடனேயும் தோசை தயாரிக்கலாம். சுவை சிறிது மாறுபடும்.





மேலும் சில உணவு வகைகள் முயற்சி செய்து சுவைக்க

மசால் தோசை	ரவா இட்லி	ஓட்ஸ் தோசை
கேவுரு அடை	ரவா தோசை

இந்த சமையல் குறிப்பு மிகவும் உபயோகமாக இருப்பின் கீழே உள்ள கருத்துக்களை பதிவிடும் பெட்டியில் தங்களது கருத்தினை பதிவிடவும்.

மேலும் தங்களைப்போல மற்றவர்களும் பயனடைய கீழே உள்ள பெட்டியின் வழியாக முகநூல், ப்ளாகர், ட்விட்டர், பிண்டரஸ்ட், G+ போன்ற சமூக வலை தளங்களிலும் பகிரவும். நன்றி.