Chaat-Vazhaithandu-Chaat

#வாழைத்தண்டுபொரிகலவை [ #வாழைத்தண்டுசாட் ] : #சாட் என்பது கேரட், வெங்காயம், தக்காளி, கொத்துமல்லி தழை மற்றும் மிளகாய்த்தூள், மல்லித்தூள், சாட் மசாலா பொடி போன்றவற்றுடன் பொரி சேர்த்து கலக்கி செய்யப்படும் ஒரு உணவு வகை. அதனை பொரி கலவை என்று தமிழில் கூறலாம். இங்கு அதனுடன் வாழைத்தண்டை பொடியாக நறுக்கி சேர்த்துள்ளேன். வாழைத்தண்டு நார் சத்து நிறைந்த உணவு. வாழைத்தண்டு கொண்டு பொதுவாக வாழைத்தண்டு பொரியல் மற்றும் தயிர் பச்சடி மட்டுமே செய்வது வழக்கம். இங்கு வாழைத்தண்டை உபயோகித்து சாட் செய்யும் முறையை காணலாம். 

தேவையானவை :
1/2 கப்	அரிசிப் பொரி
1/2 கப்	சோளப் பொரி
1/3 கப்	கேரட் சீவியது
1/2 கப்	வாழைத்தண்டு பொடியாக நறுக்கியது
1	தக்காளி, பொடியாக நறுக்கவும்
1	வெங்காயம், பொடியாக நறுக்கவும்
1/4 கப்	கொத்தமல்லி பொடியாக நறுக்கியது
தூள் & சாஸ் :
1/2 Tsp	கொத்தமல்லிதூள்
1/2 Tsp	சீரகத்தூள்
2 சிட்டிகை	மஞ்சத்தூள்
1/4 Tsp	மிளகாய்த்தூள்
1/4 Tsp	சாட் தூள்
1/4 Tsp	உப்பு
1/2 Tsp	கருப்பு உப்பு [ ராக் சால்ட் ]
1/2 Tsp	இனிப்பு & புளிப்பு புளி சாஸ்
1/4 Tsp	தேன்

மேலே கொடுக்கப்பட்டுள்ள காய்கறிகள் மற்றும் தூள்களை அவரவர் சுவைக்கேற்ப கூட்டி குறைத்துக்கொள்ளவும்.

செய்முறை :
பொரி நீங்கலாக கொடுக்கப்பட்டுள்ள அனைத்துப் பொருட்களையும் ஒரு வாயகன்ற பாத்திரத்தில் போட்டு நன்கு கலக்கவும்.
பின்பு பொரி இரண்டையும் சேர்த்து கலக்கவும்.
உப்பு மற்றும் காரம் சரி பார்க்கவும்.
பரிமாறும் கிண்ணத்தில் எடுத்து வைத்து கொத்தமல்லி தழை தூவி சுவைக்கவும்.
கலந்தவுடன் சாப்பிட்டு விடவும். இல்லையெனில் தண்ணீர் விட்டு நசநசவென ஆகிவிடும்.


குறிப்பு : மிளகாய்தூளுக்கு பதிலாக மிளகுத்தூளை சேர்த்துக்கொள்ளலாம்.





சில சமையல் குறிப்புகள் முயற்சி செய்து பார்க்க

மோதகம் காரம்	வாழைப்பூ விரல்கள்	புளிக்கூழ்
பகோடா	பஜ்ஜி

Beetroot-Vazhaithandu-Aval-Upma

#பீட்ரூட்வாழைத்தண்டுஅவல்உப்புமா : நெல்லை ஊறவைத்து சூடான வாணலியில் வறுத்தெடுத்து உடனே கல்லில் போட்டு உலக்கையால் தட்டி எடுத்து உமி நீக்கினால் #அவல் தயார். இப்போது அவல் தயாரிக்க மின்சாரத்தில் இயங்கும் உலக்கை இயந்திரம் வந்து விட்டது. அதனால் அவல் மெல்லியதாகவும் கெட்டியாகவும் கிடைக்கிறது. மெல்லியதாக இருக்கும் அவல் பால் ஊற்றி அல்லது வெள்ளம் தேங்காயுடன் கலந்து சாப்பிட அருமையாய் இருக்கும். கெட்டி அவல் உப்புமா செய்ய நன்றாக இருக்கும்.
முன்பே பல காய்கறிகளை சேர்த்து அவல் உப்புமா செய்முறையை பார்த்திருக்கிறோம். இப்போது பீட்ரூட் மற்றும் வாழைத்தண்டு சேர்த்து #உப்புமா செய்யும் விதத்தை காண்போம்.

தேவையானவை :
1 கப்	கெட்டி அவல்
1	வெங்காயம், பொடியாக நறுக்கவும்
1/4 கப்	பீட்ரூட்  துருவியது
1 Tbsp	பச்சை பட்டாணி வேக வைத்தது
1/4 கப்	வாழைத்தண்டு மெல்லியதாக அரிந்தது
1 or 2	பச்சை மிளகாய்
2 pinch	மஞ்சத்தூள்
1/4 Tsp	சீரகத்தூள்
1/4 Tsp	மிளகாய்த்தூள் [ அட்ஜஸ்ட் ]
1/2 Tsp	உப்பு [ அட்ஜஸ்ட் ]
1/2 Tsp	எலுமிச்சை சாறு [ அட்ஜஸ்ட் ]
தாளிக்க :
1/2 Tsp	கடுகு
1 Tsp	உளுத்தம் பருப்பு
2 Tbsp	நிலக்கடலை
1/4 Tsp	பெருங்காயத்தூள்
2 Tsp	நல்லெண்ணெய்
அலங்கரிக்க :
1 Tbsp	கேரட் துருவியது
1 Tbsp	கொத்தமல்லி தழை

செய்முறை :

ஒரு அகன்ற பாத்திரத்தில் கெட்டி அவலை எடுத்துக்கொள்ளவும்.
தண்ணீர் விட்டு ஓரிரு முறை கழுவவும்.
அதில் 1/2 Tsp உப்பு தூவி 1/4 கப் தண்ணீர் விட்டு கலந்து வைக்கவும்.
அடுத்து அடுப்பில் வாணலியை வைத்து எண்ணெய் விட்டு சூடேற்றவும்.
எண்ணெய் சூடானதும் கடுகு போட்டு வெடிக்க விடவும்.
கடுகு வெடித்ததும் உளுத்தம் பருப்பு மற்றும் நிலக்கடலை சேர்த்து வறுக்கவும்.
வறுபட்டதும் பெருங்காயத்தூள் சேர்த்து கருவேப்பிலை கிள்ளி போட்டு கீறி வைத்துள்ள பச்சை மிளகாயை சேர்த்து 1/2 நிமிடம் வதக்கவும்.
இப்போது நறுக்கிய வெங்காயத்தை சேர்த்து வதக்கவும்.
வெங்காயம் வதங்கி வெளிர் நிறமாக மாறியதும் பீட்ரூட், வாழைத்தண்டு மற்றும் பட்டாணியை சேர்த்து வதக்கவும்.
தேவையான உப்பு மற்றும் 2 சிட்டிகை மஞ்சத்தூள், மிளகாய்த்தூள் சேர்த்து கலந்து விடவும்.
தட்டு போட்டு மூடி 2 நிமிடங்கள் வேக விடவும்.
இரண்டு நிமிடங்களுக்கு பிறகு உப்பு போட்டு பிசறி வைத்துள்ள அவலை சேர்த்து மிதமான தீயில் நன்கு கிளறி விடவும்.
உப்பு சரி பார்த்து தேவையெனில் உப்பு சேர்க்கவும்.
1/2 Tsp எலுமிச்சை சாறு [ விருப்பப்பட்டால் ] சேர்த்து நன்கு கலந்து விடவும்.
வாணலியை மூடி போட்டு மூடி வைக்கவும்.
அடுப்பை அணைத்து விட்டு அந்த சூட்டிலேயே மூன்று நிமிடங்கள் மூடி வைக்கவும்.
பின்னர் திறந்தாள் சூடான சுவையான பீட்ரூட் வாழைத்தண்டு அவல் உப்புமா தயார்.
இதற்கு தொட்டுக்கொள்ள சட்னி தேவையில்லை. அப்படியே சாப்பிடலாம்.
விரும்பினால் தேங்காய் சட்னியுடன் சுவைக்கலாம்.
தக்காளி சாஸ் தொட்டுக்கொண்டும் சுவைக்கலாம்.
குறிப்பு : அவலின் தன்மைக்கு [ கெட்டித் தன்மை ] ஏற்ப உப்பு சேர்த்து பிசறி வைக்க தண்ணீரின் அளவை கூட்டி குறைத்துக்கொள்ளவும்.






மேலும் சில சுவை மிகுந்த உணவுக் குறிப்புகள்


பல வகையான சமையல் செய்முறைகள்

விதவிதமான பலகார வகைகள்

தொட்டுக்கொண்டு சுவைக்க

Murungai-keerai-Vazhai-thandu-Poriyal

#முருங்கைக்கீரைவாழைத்தண்டுபொரியல் : #முருங்கைக்கீரை மட்டும் உபயோகித்து பொரியல் செய்வது நமது வழக்கம். அதனுடன் #வாழைத்தண்டை சேர்த்து பொரியல் செய்து பார்த்தேன். அருமையாக இருந்தது. அதன் சமையல் குறிப்பை இங்கு காண்போம்.

தேவையானவை :
1 கப்	முருங்கைக்கீரை
6 - 7 cm நீள	வாழைத்தண்டு
1 Tbsp	கேரட் துருவியது
1	வெங்காயம், நறுக்கவும்
2 Tbsp	தேங்காய் துருவல்
1	பச்சை மிளகாய்
1	சிகப்பு மிளகாய்
1/2 Tsp	கடுகு
1 Tsp	உளுத்தம் பருப்பு
1 Tsp	எண்ணெய்
3/4 Tsp	உப்பு [ அட்ஜஸ்ட் ]

செய்முறை :

ஒரு சிறு துண்டு வாழைத்தண்டை எடுத்துக்கொள்ளவும்.

ஒரு கத்தியினால் வெளி தோலை நீக்கவும்.

பிறகு குறுக்காக வட்ட வில்லையாக நறுக்கவும்.

நறுக்கிய துண்டை தண்டிலிருந்து இழுத்தால் நாறுடன் வரும்.

இந்த நாரை ஆள்காட்டி விரலில் சுற்றி இழுத்து நீக்கவும்.

இதே போல அடுத்த துண்டை வெட்டி நாரை நீக்கவும்.

இவ்வாறு வட்ட வடிவத்தில் வெட்டிய அனைத்து துண்டுகளை சிறிது மோர் கலந்த நீரில் போட்டு வைக்கவும்.
இவ்வாறு மோர் கலந்த நீரில் வாழைத்தண்டு துண்டுகளை போட்டு வைப்பதால் நிறம் மாறாமல் இருக்கும்.
இந்த வட்ட துண்டுகளை மெல்லிய ஈர்குச்சி போல நறுக்கி மீண்டும் அதே தண்ணீரில் போட்டு வைக்கவும்.
முருங்கைக்கீரையை தண்ணீரில் இரண்டு மூன்று முறை நன்கு கழுவிய பின்னர் கத்தியால் நறுக்கி வைக்கவும்.

வாணலியை அடுப்பின் மீது மிதமான தீயில் வைத்து எண்ணெய் விட்டு சூடாக்கவும். 
எண்ணெய் சூடானதும் கடுகு போட்டு வெடித்ததும் சிகப்பு மிளகாயை கிள்ளி போட்டு பின் உளுத்தம் பருப்பை போடவும்.
அடுத்து பச்சை மிளகாயை நீள வாக்கில் கீறி சேர்க்கவும்.
தற்போது நறுக்கி வைத்துள்ள வெங்காயத்தை சேர்த்து வெளிர் நிறமாகும் வரை வதக்கவும்.
இப்போது வாழை  தண்டு மற்றும் கேரட் துருவலை சேர்த்து ஒரு முறை கிளறி விடவும்.
பின்னர் நறுக்கிய முருங்கைக்கீரை மற்றும் உப்பு சேர்த்து நன்கு கிளறி மூடி போட்டு மூடி வேக விடவும்.
முருங்கைக்கீரை மற்றும் வாழைத்தண்டு வேகும் வரை மூடி வைக்கவும்.
இரண்டும் வெந்ததும் தேங்காய் துருவல் சேர்த்து கிளறவும்.
உப்பு சரி பார்க்கவும்.
சுவையும் சத்தும் நிறைந்த முருங்கைக்கீரை வாழைத்தண்டு பொரியல் தயார்.
சாம்பார் மற்றும் ரசம் சாதத்துடன் தொட்டுக்க அருமையாக இருக்கும்.







மேலும் சில சுவையான சமையல் குறிப்புகள் செய்து சுவைக்க

வாழைப்பூ வாழைத்தண்டு தயிர் பச்சடி	கொத்தமல்லி முருங்கை க்கீரை  பொடி	முருங்கை க்கீரை சாதம்
முருங்கைக் கீரை பால் சாறு	வாழைப்பூ முருங்கைக்  கீரை கூட்டு

Vazhaipoo-Vazhaithandu-Thayir-Pachadi

வாழைப்பூவாழைத்தண்டுதயிர்பச்சடி : #வாழைப்பூ துவர்ப்பு சுவையுடையது. அதன் இதழ்களை பிரித்து உள்ளே உள்ள பூக்களை சமைக்க பயன்படுத்தி வருகிறோம். உள்ளே செல்ல செல்ல இதழ்களும் மென்மையாகவும் இளசாகவும் இருப்பதை காணலாம். ஒவ்வொரு பூவிலும் இருக்கும் காம்பும் மென்மையாக இருப்பதையும் காணலாம். பூவின் நடுப்பகுதியில் [ உள் பகுதி ] உள்ளவற்றை  வேக வைக்காமல் பச்சையாக சாப்பிடலாம். துவர்ப்பு சுவையுடன் அருமையாக இருக்கும்.
பச்சையாக சாப்பிடக் கூடிய உள்பகுதி வாழைப்பூ, வாழைத்தண்டு, வெள்ளரிக்காய், துருவிய கேரட் மற்றும் வெங்காயம் கொண்டு செய்யப்படும் சுவையான தயிர் பச்சடி பற்றி இங்கு காண்போம்.

தேவையான பொருட்கள் :
1/2 கப்	தயிர்
உள்பகுதி	வாழைப்பூ
2 Tbsp	வாழைத்தண்டு நறுக்கியது
2 Tbsp	வெள்ளரிக்காய் பொடியாக நறுக்கியது
1 Tbsp	வெங்காயம் பொடியாக நறுக்கியது
1 Tsp	காரட் துருவியது
6 - 8	கறிவேப்பிலை இலைகள்
1 Tsp	கொத்தமல்லி பொடியாக நறுக்கியது
1	பச்சை மிளகாய் பொடியாக நறுக்கியது
1/2 Tsp	உப்பு [ அட்ஜஸ்ட் ]
தாளிக்க :
1/2 Tsp	கடுகு
1/2 Tsp	உளுத்தம் பருப்பு
1/2 Tsp	நல்லெண்ணெய்

செய்முறை :
ஒரு அகன்ற பாத்திரத்தில் தயிரை அடித்து வைக்கவும்.
அதில் பொடியாக அரிந்து வைத்துள்ள அனைத்து பொருள்களையும் சேர்க்கவும்.
தேவையான அளவு உப்பு சேர்த்து நன்கு கலக்கவும்.
அடுப்பில் வாணலியை வைத்து எண்ணெய் விட்டு சூடானதும் முதலில் கடுகு சேர்த்து வெடிக்க விடவும்.
வெடித்ததும் உளுத்தம் பருப்பை சேர்த்து சிவந்ததும் அடுப்பை அணைத்து விடவும்.
தாளித்ததை கலக்கி வைத்துள்ள தயிர் பச்சடியின் மேல் கொட்டவும்.
சுவையான தயிர் பச்சடி தயார்.
பருப்பு சாதம், புலாவ், பிரியாணி, பிசிபேளே பாத் ஆகியவற்றுடன் தொட்டுக்கொண்டு சாப்பிட்டால் அருமையாக இருக்கும்.
செய்து சுவைத்து பார்க்கவும்.






மேலும் சில பச்சடி வகைகள் செய்து சுவைக்க

நெல்லிக்காய் தயிர் பச்சடி	பப்பாளி கேரட் சாலட்	பப்பாளி முள்ளங்கி சாலட்
மாங்காய் பச்சடி	வாழைத்தண்டு தயிர் பச்சடி

Vazhai Thandu Thayir Pachadi

#வாழைத்தண்டுதயிர்பச்சடி :  #வாழைத்தண்டு உடலுக்கு மிக மிக நல்லது. சிறுநீரக கல்லையே கரைக்கக்கூடிய தன்மை உடையது. நார் சத்தும் தண்ணீர் சத்தும் அதிகமாகக் கொண்டதாகும். வாழைத்தண்டு பொரியல்தான் இதனை கொண்டு செய்யப்படும் உணவு வகையாகும். தற்போது வாழை தண்டு ஜூஸ் மிக பிரபலமாக உள்ளது.
இந்த வாழை தண்டை உபயோகித்து தயிர் பச்சடி எவ்வாறு செய்யலாம் என காண்போம்.

தேவையான பொருட்கள் :
4 Tsp                                     வாழைத்தண்டு பொடியாக நறுக்கியது
1 Tsp                                     காரட் துருவியது
2 Tsp                                     வெங்காயம் பொடியாக அரிந்தது
1 Tsp                                    கொத்தமல்லி பொடியாக நறுக்கியது
1                                            பச்சை மிளகாய் பொடியாக நறுக்கியது
10                                          கறுவேப்பிலை
1/2 கப்                                 தயிர்
1/2 Tsp                                  உப்பு [ அட்ஜஸ்ட் ]

தாளிக்க :
1/2 Tsp                                 கடுகு
1 Tsp                                    உளுத்தம் பருப்பு
1/2 Tsp                                 எண்ணெய்

செய்முறை :
எல்லாவற்றையும் ஒரு கிண்ணத்தில் போட்டு நன்கு கலக்கவும்.

தேவையான அளவு உப்பு சேர்த்து கலந்து வைக்கவும்.

அடுப்பில் வாணலியை வைத்து 1/2 Tsp எண்ணெய் விட்டு கடுகு உளுத்தம் பருப்பு தாளித்து பச்சடியின் மேலே கொட்டவும்.

புலாவ், பிரியாணி, பிசிபேளே பாத் ஆகியவற்றுடன் தொட்டுக்கொண்டு சாப்பிட அருமையான பச்சடி.






மேலும் சில பச்சடி வகைகள் செய்து சுவைக்க

வாழைப்பூ தயிர்  பச்சடி	பப்பாளி கேரட் சாலட்	பப்பாளி முள்ளங்கி சாலட்
மாங்காய் பச்சடி	நெல்லிக்காய் தயிர் பச்சடி